ಕನಸುಗಳು

ನಾ ಕಂಡ ಕನಸುಗಳಲಿ

ನೇವರಿಸುವ ನೆತ್ತಿಗಳಿರಬೇಕಿತ್ತು

ಕನಸುಗಳಿಗೆ ಬಲೆ ಹೆಣೆದು

ದಾರಿ ತೋರುವ ಕಲ್ಪನೆಯ

ಹೊತ್ತಿಗೆಗಳಿರಬೇಕಿತ್ತು

ಮಾತುಗಳಿಗೆ ಹಿತ ತುಂಬುವ

ತುಟಿಗಳಿರಬೇಕಿತ್ತು

ವಾಸ್ತವಕ್ಕೆ ಚಿಮ್ಮಿ ನಿಲ್ಲುವ 

ಪಾದಗಳ ಸ್ಪರ್ಶವಿರಬೇಕಿತ್ತು 

ಸೂಕ್ಷ್ಮಕ್ಕೆ ಸೂಕ್ಷ್ಮ ತಿಳಿಸುವ 

ಅರಿವುಗಳಿರಬೇಕಿತ್ತು 

ಭಾವಕ್ಕೆ ನಂಟು ಬೆಸೆಯುವ 

ಮಿಡಿತಗಳಿರಬೇಕಿತ್ತು 

ರಾಗಕ್ಕೆ ಲಯ ಬೆಸೆಯುವ

ತಾಳ ಸಿಗುವಂತಿರಬೇಕಿತ್ತು 

ಸುಮ್ಮನೆ ಕೂತಾಗ ಸ್ಪರ್ಶಿಸಿ 

ಛೇಡಿಸಿ ಹೋಗುವ ತಂಗಾಳಿಯ 

ಸಾಂಗತ್ಯವಿರಬೇಕಿತ್ತು 

ಏನಿಲ್ಲದಿದ್ದರೂ 

ನಿನ್ನಲ್ಲಿಯ ಬುದ್ಧನ ಸಾಮರಸ್ಯದ 

ಹಿತ ಸ್ಪರ್ಶ ಸ್ವಲ್ಪವಾದರೂ 

ಇರಬೇಕಿತ್ತು. 

ಹೆಪ್ಪು

ನೀ ಅಂದು ನಕ್ಕೆ.. !

ಗಾಣದಲ್ಲಿ ಸಿಕ್ಕಿದ ನಗು ಹೆಪ್ಪುಗಟ್ಟಿ ತಿರುಗಿತು

ಗಾಣ ನಿಂತರೂ ಸವೆದ ದಾರಿಗಳು ಮಾಸಿಲ್ಲ

ತಿರುಗುತ್ತಲೇ ಇವೆ

ಒಳಗಿಳಿದ ಅದರ ಬೇರುಗಳು

ನಾ ನಕ್ಕು ಚಿಗುರೊಡೆಯಲು

ಇಂದೂ ಕಾಯುತ್ತಲೇ ಇವೆ.