ಮುತ್ತುಗ

ನಾನಂದು ನೋಡ ಹೋಗಿದ್ದು

ಕಾಡಿಗೆ ಮುತ್ತುಗ

ಮುತ್ತು ಮುತ್ತಿನ ಕೆಂಪು

ಮುತ್ತಿನ ಮುತ್ತುಗ

ನಾ ಕಂಡಿದ್ದು ಕೆಂಪು ಹವಳ ದ್ವೀಪ

ಮುತ್ತಿನ ಮುತ್ತುಗ

ಕಾಡಿನ ನಡು ಹೊಕ್ಕುಳಲ್ಲಿ

ಅವಿತಿದ್ದ ಕೆಂಪು ಮುತ್ತು ಮುತ್ತುಗ

ಕಾಡೆಲ್ಲಾ ಸೂರೆಗೊಂಡು 

ಚಪ್ಪರ ಹಾಸಿ ಘಮ ಘಮಿಸಿ 

ಸೆಳೆಯುತ್ತಿದ್ದ ಕಾಡಿನ ಕೆಂಪು 

ಕಂಪಿನ ಚೆಂದುಳ್ಳಿಯ 

ಅಂದ ರಾಣಿ ಮುತ್ತುಗ 

ಸುಡು ಬಿಸಿಲಿನ ಇನಿಯನನ್ನು 

ತಬ್ಬಿ ಜ್ವಾಲೆಯಾಗಿ ಉರಿಯುತ್ತಿದ್ದ 

ಮೋಹಗಾತಿ ಮುತ್ತುಗ 

ಅಮ್ಮ ಬಡಿಸಿ ಹಸಿವಿಂಗಿಸುವ 

ಬಾಳ ತಟ್ಟೆಯ ಮುತ್ತುಗ 

ಕಾಡಿನರಾಜನ ಹೊಳೆಯುವ 

ಕಿರೀಟ ರಾಣಿ ಮುತ್ತುಗ 

ದುಂಬಿಗಳೊಂದಿಗೆ ಪಿಸುಗುಡುವ 

ಲಾವಣ್ಯಕಾಂತಿ ಮತ್ತಿನ ಮುತ್ತುಗ 

ಕಾಡಿನ ಸ್ವಾತಿ ಮುತ್ತು ಮುತ್ತುಗ.