ಹಸಿರು ಮೆತ್ತಿ, ಮೊಳಕೆಯೊಡೆಸಿದ ನೀನೇ 

ಮೊದಲಾಗಬೇಕು, ನನ್ನ ತನು ಮನವು 

ಉಸಿರು ಬಿಟ್ಟಾಗ

ಮುತ್ತಿಕ್ಕಿ, ನಿನ್ನ ಹಸಿರು ಬನದಲಿ

ಅಂಗಾತ ಮಲಗಿಸಿ ಬಿಡು 

ಸದಾ ಹಾತೊರೆದು ನಿರಾಸೆಯ

ನೀರನ್ನು ಸುರಿಸಿದ ನನ್ನ ಕಣ್ಣುಗಳಿಗೆ

ನಿನ್ನ ಮನಸ್ಸಿನಂತೆ ವಿಶಾಲ

ಬೊಗಸೆ ಕೈಗಳಿಂದ

ಹುಡಿ ಹುಡಿಯಾದ ಮಣ್ಣು

ಉದುರಿಸು, ಮುಂದೊಂದು

ಜನ್ಮದಲ್ಲಿ ನಿನ್ನ ಸಸಿಯಾಗುವೆ

ನನ್ನ ಕಣ್ಣುಗಳಿಂದ ಹರಿದು

ಪಸೆಯಾದ ನಿನ್ನಲ್ಲಿಯ

ಗುಡ್ಡವನ್ನು ಮುಚ್ಚಲು ನೀ

ಏನನ್ನು ಬಳಸುವೆ, ಯೋಚಿಸು...

ಆಗದು ಎಂದೂ ನಿನ್ನಿಂದ

ನೀ ಹುದುಗಿಸಿದಷ್ಟು ನಾ

ಚಿಗುರುವೆ, ಚಿಗುರುವೆ

ನಿನ್ನಯ ಮನದಲ್ಲಿ

ಸದಾ ಹಸಿರಾಗಿ ನಿನ್ನ ಉಸಿರಾಗಿ.