ಪಸೆ

ಒಂದು ಹುಳು

ಹಸಿ ಹಸಿಯಾಗಿ ಮಿಣುಕಿ

ಉಸಿರಾಡುತಿತ್ತು

ನುಣುಪು ನುಣುಪಾಗಿತ್ತು

ಪಸೆಯ ಹರಿಸಿ ಭ್ರಮಿಸುತಿತ್ತು

ಅದ ಕಂಡ ಕೊರಕಲು

ಅಭಿಮಾನದಿಂದ ಕುದಿಯಿತು 

ಹುಳುವೂ ಅದರಲಿ ಮಿಂದಿತು 

ದಿನ ದಿನಗಳು ಮೈತಳೆದವು 

ಹುಳುವು ತನ್ನ ಹಸಿ ಪಸೆಯನ್ನು 

ನಿಧಾನವಾಗಿ ಬಿಚ್ಚಿ 

ಬಿಸಿಲಿನ ಬೆಳಕಲ್ಲಿ ಬಿಸುಟಿ

ಏಕಾಂತದಲ್ಲಿ ಮೈ ಚಾಚಿತು 

ಕೊರಕಲು ಇದ ಕಂಡು ಹುಬ್ಬೇರಿಸಿತು 

ಲೋಕದ ಹಾಲ್ಬಣ್ಣವ ಅರಿತು 

ತಾನು ಕುಳಿತಲ್ಲೇ ಕುಸಿದು 

ನೀರಾಗಿ ಮಿಣುಕಿತು 

ಪಸೆಯ ಉಳಿಸಿ ಅಮರತ್ವವ ಕುಡಿಯಿತು