ನನ್ನೊಳಗಿನ ನಾನಾಗಿ ಬಿತ್ತಿದ
ಅದು ನನ್ನೊಳಗಿನ ನಾವಾಯಿತು
ಹಗಲು ರಾತ್ರಿ ತನ್ನ ಬೆವರು
ಘಾಟಿನ ಸಿಡಿ ಮಿಡಿಯನ್ನು ಮೆತ್ತಿದ
ಮೊಳೆತ ಗಿಡಕೆ ತನ್ನಂತೆ ಪ್ರಾಮಾಣಿಕತೆಯ
ತಾಜಾತನದ ನೀರುಣಿಸಿದ
ಅಮ್ಮ ಮುಲಾಮು ಇಲ್ಲದ ತನ್ನ
ನೋವುಗಳಿಂದ ಪೋಷಣೆ ಮಾಡಿ
ನಗೆಯೆಂಬ ಹರಿದ ಚಾಪೆ ಹೊದಿಸಿದಳು
ಅವರಿಬ್ಬರ ಕತ್ತಲು ಬೆಳಕಿನ ಈಜಾಟದಲ್ಲಿ
ಸಸಿ ಬಾಡದೆ ಚಿಗುರೊಡೆಯಿತು
ಮಳೆ ಬಿಸಿಲಿನ ಒಲವ ತಾಪಕೆ
ಇಬ್ಬರೂ ತಮ್ಮ ದೇಹದ ಚರ್ಮ
ಬಿಸಿಲುಡಿಗೆ ಮಾಡಿ
ಗಿಡಕೆ ಹೊರಿಸಿದರು
ಗಿಡ ಕವಲೊಡೆಯುವುದರಲ್ಲಿ
ಎಡವಿದರು ಮೂಲತ್ವದಲ್ಲಿ
ಅರಳಿ ಮರವಾಯಿತು
ಆದರೀಗ ಬುಡಕೆ ತಗುಲಿದೆ
ಮಾರ್ಮಿಕ ಹುಳುವಿನ ಕೊರೆತ
ಉಳಿವು ಅಳಿವುಗಳಲ್ಲಿ
ಪ್ರಶ್ನೆಯಾಗಿ ಕಂಡಿಹುದು
ನನ್ನೊಳಗಿನ ನಾನು -ನಾವು.
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ