ಸ್ವಾತಂತ್ರ್ಯ

ನಿನಗೊಂದು ಸ್ವಇಚ್ಚೆಯ ಪ್ರಶ್ನೆ

ಉತ್ತರಿಸುವೆಯ ಅಪ್ಪಿ...

ಸ್ವಾತಂತ್ರ್ಯಕ್ಕೆ ರೆಕ್ಕೆ ಬರುವುದು

ಯಾವಾಗ...?

ಪ್ರತಿ ಮನೆ -ಮನಗಳು

ಮಸಣದಿಂದೆದ್ದು ಹೊರಬರುವುದು

ಯಾವಾಗ...?

ಕಳ್ಳಗಿಂಡಿಯಲ್ಲಿ ಸದಾ ಬಗ್ಗಿ ನೋಡುವ

ಸ್ವಾತಂತ್ರ್ಯ, ಮುಖಾಮುಖಿಯಾಗುವುದು

ಯಾವಾಗ..?

ತಳ್ಳುವಿಕೆ, ನೂಕುವಿಕೆಗೆ ನಾಚುವ ಸ್ವಾತಂತ್ರ್ಯ

ರಾರಾಜಿಸುವುದು ಯಾವಾಗ...?

ಹೆಣ್ಮಕ್ಕಳ ಹಣೆಯಗಲದ ಕುಂಕುಮದಲಿ 

ಮಾತಾಗುವುದು  ಯಾವಾಗ...? 

ಹೆಂಗಳೆಯರ ಕಾಲ್ಗೆಜ್ಜೆಯಲಿ 

ನಲಿದಾಡುವ ದನಿಯಾಗುವುದು 

ಯಾವಾಗ...? 

ಕಂಬಗಳಲಿ ಮುಗಿಲ್ನೋಡುತ 

ಪಟ ಪಟನೆ ಕೈ ಬೀಸಿ ಕರೆಯುವ 

ಬಾವುಟಕ್ಕೆ ಅರ್ಥದ ಗಾಳಿ 

ಸ್ಪರ್ಶಿಸುವುದು ಯಾವಾಗ..? 

ಸ್ವಾತಂತ್ರ್ಯಕ್ಕೂ ಸ್ವಾತಂತ್ರ್ಯ 

ಮುತ್ತಿಕ್ಕುವುದು ಯಾವಾಗ..? 

ನನ್ನ ದೇಶ, ಬಾಪು ಬಯಸಿದ 

ಸ್ವಾತಂತ್ರ್ಯ ಕೊಡುವುದು ಯಾವಾಗ..? 

ಉತ್ತರಿಸುವೆಯ ಅಪ್ಪಿ.....?